Pa-khek-lé Siu-tēng-pán Sèng-keng 巴克禮修訂版聖經

1. Pa-khek-lé Siu-tēng-pán Sèng-keng 巴克禮修訂版聖經 Kū-iok舊約Genesis “Chhòng-sè-kì”《創世記》 Tē jī-cha̍p-poeh chiuⁿ第二十八章

2. “Chhòng-sè-kì”《創世記》GenesisTē jī-cha̍p-poeh chiuⁿ第二十八章 Tē 1 chat 第一節 Í-sat kiò Ngá-kok lâi, kā i chiok-hok, ia̍h hoan-hù i kóng, Lí m̄-thang chhoā Ka-lâm ê cha-bó͘-gín-á choè bó͘.以撒叫雅各來，kā伊祝福， 亦吩咐伊講，你m̄-thang娶 迦南ê cha-bó͘-gín-á做bó͘。

3. “Chhòng-sè-kì”《創世記》Genesis Tē jī-cha̍p-poeh chiuⁿ第二十八章 Tē 2 chat 第二節 Lí khí-lâi, khì Pa-tàn-a-lân, kàu lí ê goā-kong Pí-thó͘-lī ê ke; tī lí ê bú-kū La̍h-pan cha-bó͘-kiáⁿ ê tiong-kan, chhoā chi̍t-ê choè bó͘.你起來，去Pa-tàn-a-lân， 到你ê外公Pí-thó͘-lī ê家； tī你ê母舅拉班cha-bó͘-kiáⁿ ê中間，娶一個做bó͘。

4. “Chhòng-sè-kì”《創世記》Genesis Tē jī-cha̍p-poeh chiuⁿ第二十八章 Tē 3 chat 第三節 Goān choân-lêng ê Siōng-tè sù-hok lí, hō͘ lí siⁿ-thoàⁿ chin-choē, chiâⁿ-choè choē-choē cho̍k.願全能ê上帝賜福你， hō͘你生湠真choē， 成做choē-choē族。

5. “Chhòng-sè-kì”《創世記》Genesis Tē jī-cha̍p-poeh chiuⁿ第二十八章 Tē 4 chat 第四節 Koh chiong só͘ èng-ún A-pek-la̍h-hán ê hok-khì hō͘ lí, kap lí ê hō͘-è; hō͘ lí sêng-chiap lí só͘-kià-ku ê toē, chiū-sī Siōng-tè só͘ hō͘ A-pek-la̍h-hán-ê.Koh將所應允亞伯拉罕 ê福氣hō͘你，kap你ê後裔； hō͘你承接你所寄居ê地， 就是上帝所hō͘亞伯拉罕ê。

6. “Chhòng-sè-kì”《創世記》Genesis Tē jī-cha̍p-poeh chiuⁿ第二十八章 Tē 5 chat 第五節 Í-sat chhe Ngá-kok khì; i chiū khì Pa-tàn-a-lân; kàu A-lân lâng Pí-thó͘-lī ê kiáⁿ La̍h-pan hia; i sī Ngá-kok Í-sò ê bú-kū.以撒差雅各去； 伊就去Pa-tàn-a-lân； 到A-lân人Pí-thó͘-lī ê kiáⁿ拉班hia； 伊是雅各以掃ê母舅。

7. “Chhòng-sè-kì”《創世記》Genesis Tē jī-cha̍p-poeh chiuⁿ第二十八章 Tē 6 chat 第六節 Í-sò khoàⁿ-kìⁿ Í-sat kā Ngá-kok chiok-hok, koh chhe i khì Pa-tàn-a-lân, beh tùi hia chhoā-bó͘; ia̍h khoàⁿ-kìⁿ chiok-hok i ê sî, hoan-hù i kóng, M̄-thang chhoā Ka-lâm ê cha-bó͘-gín-á choè bó͘;以掃看見以撒kā雅各祝福， koh差伊去Pa-tàn-a-lân，beh tùi hia娶bó͘； 亦看見祝福伊ê時，吩咐伊講， M̄-thang娶迦南ê cha-bó͘-gín-á做bó͘；

8. “Chhòng-sè-kì”《創世記》Genesis Tē jī-cha̍p-poeh chiuⁿ第二十八章 Tē 7 chat 第七節 koh khoàⁿ-kìⁿ Ngá-kok thiaⁿ pē-bú ê oē, khì Pa-tàn-a-lân;koh看見雅各 聽父母ê話， 去Pa-tàn-a-lân；

9. “Chhòng-sè-kì”《創世記》Genesis Tē jī-cha̍p-poeh chiuⁿ第二十八章 Tē 8 chat 第八節 Í-sò chiū chai Ka-lâm ê cha-bó͘-gín-á, i ê lāu-pē Í-sat m̄-tèng-ì;以掃就知迦南 ê cha-bó͘-gín-á， 伊ê老父以撒m̄中意；

10. “Chhòng-sè-kì”《創世記》Genesis Tē jī-cha̍p-poeh chiuⁿ第二十八章 Tē 9 chat 第九節 Í-sò chiū khì Í-si̍t-má-lī hia, tī i hiah ê bó͘ í-goā, koh chhoā Má-hap-la̍h choè-bó͘; i sī A-pek-la̍h-hán ê kiáⁿ Í-si̍t-má-lī ê cha-bó͘-kiáⁿ, Nî-pâi-iok ê sió-bē.以掃就去以實瑪利hia，tī伊hiah-ê bó͘以外，koh娶Má-hap-la̍h做bó͘； 伊是亞伯拉罕ê kiáⁿ以實瑪利 ê cha-bó͘-kiáⁿ，Nî-pâi-iok ê小妹。

11. “Chhòng-sè-kì”《創世記》Genesis Tē jī-cha̍p-poeh chiuⁿ第二十八章 Tē 10 chat 第十節 Ngá-kok lī-khui Pia̍t-sī-pa, ǹg Hap-lân khì.雅各離開別士巴， ǹg哈蘭去。

12. “Chhòng-sè-kì”《創世記》Genesis Tē jī-cha̍p-poeh chiuⁿ第二十八章 Tē 11 chat 第十一節 Kàu chi̍t só͘-chāi, in-ūi ji̍t lo̍h, chiū tī-hia hioh-mî; tùi hiah ê chio̍h-thâu ê tiong-kan, the̍h chi̍t-tè choè chím-thâu, tī-hia khùn.到一所在，因為日落， 就tī-hia歇暝；tùi hiah-ê石頭 ê中間，the̍h一塊 做枕頭，tī-hia睏。

13. “Chhòng-sè-kì”《創世記》Genesis Tē jī-cha̍p-poeh chiuⁿ第二十八章 Tē 12 chat 第十二節 Bāng-kìⁿ ū thui khiā tī toē-ni̍h, thui-téng tú-thiⁿ; ū Siōng-tè ê sù-chiá tī thui-ni̍h teh chiūⁿ-lo̍h.夢見有梯khiā tī地裡， 梯頂抵天；有上帝 ê使者tī梯裡teh上落。

14. “Chhòng-sè-kì”《創世記》Genesis Tē jī-cha̍p-poeh chiuⁿ第二十八章 Tē 13 chat 第十三節 Iâ-hô-hoa khiā tī thui-téng, kóng, Goá sī Iâ-hô-hoa lí ê chó͘ A-pek-la̍h-hán ê Siōng-tè, ia̍h sī Í-sat ê Siōng-tè. Goá beh chiong lí hiān-chāi só͘ khùn ê toē siúⁿ-sù lí, kap lí ê hō͘-è.耶和華khiā tī梯頂，講， 我是耶和華你ê祖亞伯拉罕ê上帝， 亦是以撒ê上帝。我beh將你 現在所睏ê地賞賜你，kap你ê後裔。

15. “Chhòng-sè-kì”《創世記》Genesis Tē jī-cha̍p-poeh chiuⁿ第二十八章 Tē 14 chat 第十四節 Lí ê hō͘-è beh chhin-chhiūⁿ toē-chiūⁿ ê thô͘-soa; lí beh tùi tang, sai, lâm, pak lâi hoat-tián; toē-chiūⁿ bān-cho̍k beh in-ūi lí kap lí ê hō͘-è tit-tio̍h hok-khì.你ê後裔beh親像地上ê土沙； 你beh tùi東西南北來發展； 地上萬族beh因為你 kap你ê後裔得tio̍h福氣。

16. “Chhòng-sè-kì”《創世記》Genesis Tē jī-cha̍p-poeh chiuⁿ第二十八章 Tē 15 chat 第十五節 Goá ia̍h kap lí tī-teh, lí bô-lūn khì tah-lo̍h, Goá beh pó-hō͘ lí; ia̍h beh chhoā lí tò-lâi chit só͘-chāi, lóng bô pàng-sak lí, kàu Goá chiâⁿ tùi lí só͘ kóng-ê.我亦kap你tī-teh，你無論去tah-lo̍h， 我beh保護你；亦beh chhoā你 tò來chit所在，lóng無放sak你， 到我成對你所講ê。

17. “Chhòng-sè-kì”《創世記》Genesis Tē jī-cha̍p-poeh chiuⁿ第二十八章 Tē 16 chat 第十六節 Ngá-kok khùn-chhíⁿ kóng, Iâ-hô-hoa chin-chiàⁿ tī-chia, goá kéng-jiân m̄-chai.雅各睏醒講， 耶和華真正tī-chia， 我竟然m̄知。

18. “Chhòng-sè-kì”《創世記》Genesis Tē jī-cha̍p-poeh chiuⁿ第二十八章 Tē 17 chat 第十七節 Chiū kiaⁿ kóng, Chit só͘-chāi kàu chiah thang kiaⁿ! m̄-sī pa̍t-hāng, che sī Siōng-tè ê chhù, che sī thiⁿ ê mn̂g.就驚講，Chit所在到 Chiah thang 驚！m̄是別項， 這是上帝ê厝，這是天ê門。

19. “Chhòng-sè-kì”《創世記》Genesis Tē jī-cha̍p-poeh chiuⁿ第二十八章 Tē 18 chat 第十八節 Ngá-kok chá-chá khí-lâi, chiong i choè chím-thâu ê chio̍h khiā choè thiāu; tò iû tī téng-bīn.雅各早早起來， 將伊做枕頭ê石 khiā做柱；倒油tī頂面。

20. “Chhòng-sè-kì”《創世記》Genesis Tē jī-cha̍p-poeh chiuⁿ第二十八章 Tē 19 chat 第十九節 Chiū miâ hit só͘-chāi kiò Pek-te̍k-lī, chit ê siâⁿ pún miâ Lō͘-su.就名hit所在 叫Pek-te̍k-lī， chit-ê城本名Lō͘-su。

21. “Chhòng-sè-kì”《創世記》Genesis Tē jī-cha̍p-poeh chiuⁿ第二十八章 Tē 20 chat 第二十節 Ngá-kok hē-goān kóng, Siōng-tè nā kap goá tī-teh, tī goá só͘ kiâⁿ ê lō͘ pó-hō͘ goá, koh hō͘ goá ū mi̍h thang chia̍h, ū saⁿ thang chhēng,雅各下願講，上帝若 kap我tī-teh，tī我所行ê路保護我， koh hō͘我有物thang食， 有衫thang穿，

22. “Chhòng-sè-kì”《創世記》Genesis Tē jī-cha̍p-poeh chiuⁿ第二十八章 Tē 21 chat 第二十一節 hō͘ goá an-jiân tò-lâi goá ê pē ê chhù, chiū Iâ-hô-hoa tek-khak choè goá ê Siōng-tè.hō͘我安然tò來我ê父ê厝， 就耶和華的確 做我ê上帝。

23. “Chhòng-sè-kì”《創世記》Genesis Tē jī-cha̍p-poeh chiuⁿ第二十八章 Tē 22 chat 第二十二節 Goá só͘ khiā choè thiāu ê chio̍h beh choè Siōng-tè ê chhù; kìⁿ-nā Lí só͘ siúⁿ-sù goá ê, goá beh chiong cha̍p-hūn ê chi̍t-hūn hiàn hō͘ Lí.我所khiā做柱ê石 beh做上帝ê厝； 見若你所賞賜我ê，我beh將 十份ê一份獻hō͘你。