主題二十三 : 小動物 一 田蛤仔

1. 主題二十三:小動物一 田蛤仔 一隻田蛤仔四支腿， 兩蕊目睭一支喙， 腹肚大大欲放屁， PU〜噗通!噗通!跳落水。

2. 二 紅毛蟹 紅毛蟹， 八支跤， 上愛覕佇石頭跤； 毋驚澹， 毋驚焦， 身軀的殼若雨幔， 啥人欺負伊， 伊就用鉸刀共鉸鉸鉸。

3. 三 刺毛蟲 刺毛蟲 毛聳聳 真驚人 伊講 小朋友 毋免驚 我是蝶仔的幼蟲 過幾工 會換媠衫來舞弄

4. 四 塗蚓仔 塗蚓仔 頭尖尖 尾尖尖 也無爪 也無角 一條腸仔 尾到頭 塗跤兜 鑚透透

5. 五 火金姑 火金姑，火金姑， 頭紅紅，翅烏烏， 上愛覕佇草仔埔； 火金姑火金姑， 電火藏佇伊腹肚， 暗時通好去揣某。

6. 六 黃蝶仔 黃蝶仔，衫黃黃， 慢慢仔飛， 到花園， 看著花， 一支喙嘟甲長長長。

7. 露螺 露螺公，露螺婆， 厝揹咧，賴賴趖， 四界去𨑨迌； 毋驚竹篙， 毋驚落大雨， 上驚去到大車路。

8. 主題二十四:禽畜一 小雞公 小雞公愛唱歌 喔喔喔 緊起來喔 喔喔喔 起來聽我唱歌喔 嘿嘿嘿 誠歹勢喔 嘿嘿嘿 天袂光喔 嘿嘿嘿 原來是 月娘喔

9. 二 鴨咪仔 鴨咪仔，真古錐， 行路跤開開， 尻川扭一下扭一下， 行到草仔堆， 看著一尾塗蚓仔， 大喙就開開開。

10. 三 粉鳥 粉鳥、粉鳥， 有夠巧， 飛去遠遠了後， 按怎轉去攏有才調， 伊毋知有咧算， 飛過幾支電火柱?

11. 四 雞佮鴨 雞仔喙尖尖， 鴨仔喙扁扁， 雞仔愛食米， 鴨仔愛食魚。

12. 五 厝頂彼隻貓 厝頂彼隻貓， 規工喵喵喵， 是咧學唱歌， 抑是腹肚枵? 來來來，來阮兜， 我請你食一个大魚頭。

13. 六 彼隻狗 隔壁彼隻狗， 規工拋拋走， 看著主人， 吠甲 ngau ngau ngau， 看著生份人， 驚甲變啞口。

14. 去散步 雞仔鴨仔相招去散步， 貓仔狗仔愛哭愛綴路， 羊咩仔講伊上𠢕𤆬路， 踅來踅去揣無街仔路。

15. 主題二十五:植物一 菱角 菱角，菱角，兩支角， 假那水牛的頭殼， 菱角，菱角，親像龜， 愛佇水底洗身驅。

16. 二 花芳啊 玉蘭花講:因為露水滴，所以我芳啊。 茉莉花講:因為日頭出，所以我芳啊。 夜來香講:因為夜來啊，所以我芳啊。 所有的白花講:因為你來啊， 所以我芳啊。 小寶講:因為恁真芳，所以我來啊。

17. 三 草仔 風真大，雨真粗， 一陣陣，落佇草仔埔。 草仔欉，真幼枝， 予風吹東又吹西， 毋驚風，毋驚雨。 風會過，雨會停， 草仔徛甲挺挺挺。

18. 四 蘭花 蘭花芳， 蘭花媠， 蘭花哪會芳閣媠， 我逐工咧唱歌沃水。

19. 五 花 花園內花真濟 春天到開齊齊 梅瑰花真高貴 誠可惜伊有刺 白茉莉較細蕊 清香味我佮意 滿山紅規山坪 紅的粉的攏真媠 猶毋過爸爸講 上界媠是我的乖女兒

20. 六 玉蘭花、玫瑰花 大姐種玫瑰花， 二姐種玉蘭花， 玫瑰花紅紅紅， 開甲媠噹噹， 玉蘭花芳芳芳， 阮兜芳咧幾若工。

21. 見笑草 見笑草，見笑草， 你哪遐爾驚見笑， 人嗑著，頭就鉤， 見笑草，見笑草， 你哪遐爾驚見笑， 人倚去，面就紅。 小朋友，小朋友 人我毋是驚見笑， 人我是、人我是 嘻嘻--- 真驚癢。

22. 主題二十六:環境保育一 為啥物 黃昏時 滿天邊 咻咻咻 親像直升機咧飛的田嬰 無看見啊 為啥物 為啥物 下暗時 滿田邊 嘓嘓嘓 親像牽風櫃咧吼的水雞 無看見啊 為啥物 為啥物

23. 半暝時 滿溪邊 閃閃爍爍 親像天星的火金姑 無看見啊 為啥物 為啥物 我聽著 我聽著 田嬰佇咧哭 我聽著 我聽著 水雞佇咧吼 我看著 我看著 火金姑目屎佇咧流

24. 二 白翎鷥 白翎鷥，佗位去? 聽人講你擔畚箕， 又閣聽人講你抾著兩仙錢， 飛去外國欲買魚。 白翎鷥， 我想你。

25. 三 糞埽車 人人叫我糞埽車， 街頭巷尾四界行， 叮叮噹噹愛唱歌， 腹肚大大喙闊闊， 糞埽是我上愛食。

26. 四 樹仔無看見 彼欉大欉樹仔， 親像變魔術， 過一暝，就無去， 透早，厝角鳥仔吱吱啾啾， 較暗，白頭鵠仔宣告講， 咱著愛搬厝。 因為遮，人欲起厝。

27. 五 溪仔水 溪仔水，烏閣濁， 魚仔蝦仔毋敢來𨑨迌。 溪仔水，清清清， 魚仔蝦仔上愛蹛的大房間。

28. 六 我哪攏毋捌 雁鴨仔?我毋捌! 抐桮?我嘛是毋捌! 水筆仔?我毋捌! 鯪鯉仔?我猶原毋捌! 是按怎? 是按怎? 我哪攏毋捌。 是啥人? 是啥人? 害我攏毋捌。

29. 溪水 溪水溪水嘩啦嘩啦， 溪水溪水會唱歌， 溪水閣會共我洗手、洗跤。