Trabou fis ta eksistí di bèrdat?

1. Trabou fis ta eksistí di bèrdat? Laika ta un damsita. E ta traha den kantoor. E ta hopi orguyoso.

2. E ta haña tur fishi ku ta traha ku sushi i sushedat mashá stinki. Pesei e no ta papia mes ku hendenan ku tin e tipo di trabounan asina. Ché, fis!

3. Un mal soño Riba un dia Laika a haña un mal soño. E ta soña ku tur hende ku tin un trabou ku ta atendé ku sushi ta drenta wèlga. Nan no ke hasi e trabou sushi nunka mas. Otro hende wak kon nan ta saka nan sòm!

4. Sushi ta akumulá. Pero komo ku niun hende no ke traha trabou sushi mas, sushi a kuminsá ta akumulá. Den kasnan, riba kaya i asta den su kantor tin un monton di sushi. Bleki, kùp, papel, kaha, tubu di enk, tesju i asta e berpùt a yena te basha afó. Abrenunsia, esta un porkeria!

5. Hendenan a subi kaya pa protestá kontra e wèlga. Nan ta eksigí pa tur hende bai traha inmediatamente. Pero ni un hende no ke traha trabou sushi mas. Anto mientras tantu sushi ta keda akumulá.

6. E kos ta bira kada bia mas pió. Awor tin tur sorto di plaga ta kana rònt. Den su kantor Laika ta sintá mei mei di kakalaka, djaka i raton. Anto muskita ta bula tur kaminda. Esta fis, no! Kasi e no ke kome mas. E ta bira flaku flaku.

7. Laika ta spièrta spantá. E ta papa muhá di sodó. Danki Dios tabata un soño. Pero desde awe, e ta wak tur fishi ku otro wowo. Nos tur mester di otro. Si no ta eksistí hende pa hasi trabou sushi, henter mundu lo a bira un monton di sushi.

8. Laika no ta orguyoso mas. Awor e ta komprondé ku tur hende tin mester di otro. E ta hari ku e sirbiente. E ta aseptá tur hende i ta papia ku tur hende. E mal soño ei a sakudí Laika for di soño. Kada fishi tin su importansha. Ni un fishi ta menos ku e otro. Danki Dios tin hende riba e mundu aki ku ta dispuesto pa ehersé fishinan ku ta menos agradabel.